လိုင်းပေါ်မှာ ညီတစ်ယောက် သူနဲ့အတူတွဲရိုက်ပြီး တင်ထားတာကိုမြင်ပြီး တိုင်းရင်းသားစာရေးဆရာတစ်ယောက်အဖြစ် သတိထားမိတာ။
နောက်မှ သူ့စာအုပ် အိုဘယ့် အစိမ်းတို့မြေက လက်ထဲရောက်လာတာ။
မူရင်းစာအုပ်က အင်္ဂလိပ်လိုရေးထားပြီး ၂၀၀၂ ခုနှစ်အတွက် တောင်အာရှ အကောင်းဆုံးစာပေဆုရခဲ့ပါတယ်။
ဒီစာအုပ်ကို ဆရာသင့်လူက ဘာသာပြန်ထားတာပါ။
စာအုပ်မှာ အပိုင်းသုံးပိုင်းပါပါတယ်။
ပထမပိုင်းက မျိုးနွယ်စုကဗျာ တဲ့
ဒီအပိုင်းမှာ ကျနော်တို့ နည်းနည်းပဲသိတဲ့ ပဒေါင်လူမျိုးစုအကြောင်းတွေ၊ သူတို့ရိုးရာဓလေ့တွေ၊ ကိုးကွယ်ယုံကြည်မှုတွေ၊ နေ့စဉ်လူမှုဘဝအကြောင်းတွေကို သူ့ရဲ့ ပထမအရွယ် အတွေ့အကြုံတွေနဲ့ ပေါင်းပြီး ရေးထားတယ်။
ကျနော်ကတော့ ဒီအပိုင်းကိုဖတ်ရင်း Alex Haley ရဲ့ Roots စာအုပ်ထဲက အာဖရိကန်ကျေးရွာတွေကိုပါ သတိရနေမိတယ်။
ဒုတိယပိုင်းကတော့ ဖိရင်ကြွ၊ ထိရင်ချ၊ အားမတန်တော့ မာန်ကိုလျှော့ တဲ့
ဒီအပိုင်းမှာ အသိအကျွမ်း တစ်ယောက်မှမရှိတဲ့ တောင်ပေါ်တိုင်းရင်းသားတစ်ယောက် မြေပြန့်ကို ပထမဆုံး ဆင်းလာရတဲ့အတွေ့အကြုံတွေ ပါပါတယ်။
တိုင်းရင်းသားတစ်ယောက်အနေနဲ့ လုံးဝ အစိမ်းသက်သက်လိုဖြစ်နေတဲ့ ပတ်ဝန်းကျင်မှာ ကြုံရတဲ့အခက်အခဲတွေကို ရေးပြထားတယ်။
တက္ကသိုလ်တက်ချိန်မှာ မဆလ အစိုးရရဲ့ ငွေစက္ကူတွေ တရားမဝင်ကြောင်း ကြေညာချက်တွေနဲ့ ကြုံခဲ့သလို မန္တလေးက ၈၈အရေးတော်ပုံ လှုပ်ရှားမှုအကြောင်းကိုလည်း တစွန်းတစ ဖတ်ရပါလိမ့်မယ်။
နောက်ပြီးတော့ မွေးရပ်မြေမှာ ကျောင်းသားခေါင်းဆောင်အနေနဲ့ လှုပ်ရှားမှုတွေ၊လွတ်မြောက်နယ်မြေကို ထွက်ပြေးဖို့ ကြိုးစားပုံတွေကိုလည်း ဖတ်ရဦးမှာပါ။
ဒီအပိုင်းကတော့ ကျနော်သိပ်မသိသေးတဲ့ တောင်ပိုင်း ABSDF အကြောင်းတချို့၊ တိုင်းရင်းသားတွေရဲ့ ပြည်မနဲ့ စစ်တပ်အပေါ်အမြင်၊ တွေးတောင်မတွေးမိတဲ့ မြင်ကွင်းတချို့ကို ယုံရခက်ခက်နဲ့ ယုံလိုက်ရတဲ့အပိုင်းပေါ့။
တတိယပိုင်းကတော့ ကယ်တင်ခြင်း လို့ ခေါင်းစဉ်တပ်ထားတယ်။
တက္ကသိုလ်တက်တုန်းက သိခဲ့ရတဲ့ ကိန်းဘရစ်ချ် တက္ကသိုလ်က ပါမောက္ခတစ်ယောက်အကူအညီနဲ့ ထိုင်းမြန်မာနယ်စပ် လွတ်မြောက်နယ်မြေကနေ ကိန်းဘရစ်ချ်ကိုသွားတဲ့ ခရီးလမ်းပေါ့။သိပ္ပံမောင်ဝရဲ့ အောက်စဖို့ဒ်တက္ကသိုလ် ခရီးသွားမှတ်တမ်းကို တစွန်းတစ သတိရမိတယ်။
-------------------------------------------------------
ကျနော်တော့ ဒီစာအုပ်ကနေ
-သေသေချာချာ မသိသေးတဲ့ တိုင်းရင်းသားမျိုးနွယ်စုတစ်စုအကြောင်းကို ရေရေရာရာ သိလိုက်တယ်။
-မမီခဲ့တဲ့ မဆလခေတ်နဲ့ တချို့တဝက် သိထားမိတဲ့ ၈၈ အရေးတော်ပုံ ရုပ်ပုံလွှာကို ပိုပီသအောင် ဖြည့်လိုက်နိုင်တယ်။
-တောင်ပိုင်း ABSDF အကြောင်း နည်းနည်း ပိုသိသွားတယ်။
-ဘာကြောင့် မဆလကို ဒီလောက် မုန်းခဲ့ကြတယ် ဆိုတာကို နည်းနည်း ပို နားလည်လာမိတယ် (ဦးနှောက်ဆေးခံထားခဲ့ရတာက နည်းနည်းနောနောမဟုတ်ဘူးလေ)
 |
| From the Land of Green Ghosts - အိုဘယ့် အစိမ်းတို့မြေ |
ကျနော် စာအုပ်တစ်အုပ်ကိုဖတ်ပြီးရင် အညွှန်းရေးလေ့မရှိပါဘူး။ ဒါပထမဆုံးရေးဖူးတဲ့စာအုပ်ပဲဗျ။
ဖတ်သင့်တဲ့ စာတစ်အုပ်လို့ ခံယူမိလို့ နားလည်ခံစားမိသလို စာအုပ်အညွှန်း(အနေနဲ့)ရေးလိုက်တာပါ။
မြန်မာဘာသာပြန်ကို ငါတို့စာပေကထုတ်ဝေတာဖြစ်ပြီး စျေးနှုန်းက ၃၅၀၀ကျပ် ဖြစ်ပါတယ်။
လေးစားစွာဖြင့်
ဦးမာဃ (ခေတ္တ လူ့ပြည်)
0 comments :
Post a Comment