ညဟာ တိတ်ဆိတ်နေတယ်။

ညဟာ တိတ်ဆိတ်လို့နေတယ်။

ည… ဆိုတာ လူသားတွေ အိပ်စက် အနားယူတဲ့အချိန်ကိုး



သူတကာတွေ အိပ်နေချိန်မှာ ဒီမှာတော့ တစ်ယောက်ထဲ ငူငူငိုင်ငိုင်နဲ့



ကွန်ပျူတာရှေ့မှာ တစ်ယောက်တည်း

ရတာမလို လိုတာမရပါလားနော်…..

ခေါင်းထဲမှာ အတွေးတွေ ပြည့်ကျပ်နေတယ်။

ဂျောင်းဂျောင်းပြေးနေအောင် ချ ရေးချင်နေပေမင့် ဘယ်လို အစဆွဲထုတ်ရမှန်းမသိ

ထုတ်ထားသမျှ ရေးဖို့ အစလေးတွေကလဲ အကိုးအကားက မစုံသေး

စာ မရေးနိုင်တဲ့ အချိန်တုန်းကတော့ ရေးချင်လိုက်တဲ့ အကြောင်းအရာတွေ…….တွေးမိလိုက်တဲ့အတွေးတွေ…………

အောတိုက်နေတာပဲ။

အခု စာရေးချိန်ရလို့ ရေးမယ်လုပ်တော့

တချို့ အတွေးတွေက ပူပူနွေးနွေး ရေးရမယ့်အရာတွေဆိုတော့ လက်ရှိအချိန်မှာ အချိန်လွန်သွားပြီ

ဒိတ်အောက်သွားသော အတွေးများပေါ့

တချို့တွေက အပေါ်က ပြောတဲ့အတိုင်း အကိုးအကား ရှာရဦးမယ်

အခု ချရေးလိုက်ရင် သူများနားလည်ဖို့ မပြောနဲ့ ကိုယ်တိုင်တောင် ချာချာလည်မယ့်ပုံ။

ချာချာမလည်တဲ့ အရာတွေကျပြန်ရင်လဲ အချက်အလက် မစုံတာကြောင့် သတင်းအမှားဖြစ်နိုင်ချေကလဲ အတော်များနေပြန်ပေါ့။

စာရေးသူတစ်ယောက်ရဲ့ အလိုမပြည့်မှုဆိုတာ ဒါတွေလားမသိ။

ကိုယ်တိုင်လဲ ဆင်ခြေတွေ ပေးနေမှန်း သိနေတယ်။

ဒါပေမင့် ခံစားချက် မပါဘဲနဲ့လဲ စာကို မရေးချင် (ရသပဲဖြစ်ဖြစ် သုတပဲဖြစ်ဖြစ်)

ဆရာကံချွန်ရဲ့ ဇာတ်ကောင် မဖော့ ပြောသလိုဖြစ်နေပြီ။

ရေးဖို့ အခွင့်အရေး မရခင်တုန်းကတော့ ရေးစရာ ကုန်ကြမ်းတွေ စီထားတဲ့ အတွေးတွေ တစ်ပုံတစ်ပင်

တကယ် ရေးဖို့ နေရာတွေပေါ်လာတဲ့အခါ၊ ရေးဖို့ အခြေအနေ ပေးတဲ့အခါကျတော့ အဲဒါတွေက ကြက်ပျောက်ငှက်ပျောက် ပျောက်သွားပြီ။

ကိုယ့်ကို တည့်တည့် ပြောနေသလား မှတ်ရတယ်။

ပိုင်းလော့ဆရာတော်ရဲ့ စကားလေးကတော့ မှတ်သားစရာအကောင်းသား

အချိန်တိုင်း တွေးနေရင်း ဘဝပြောင်းနေသည် တဲ့။

ဒီမတော့ တွေးနေရင်း အချိန်ဖြုန်းနေသည် လို့ပဲ ပြောရမလို။

မသိရင်တော့ တွေးတဲ့အတွေးတွေက အတွေးအခေါ်ပညာရှင်လောက်နီးနီးပဲ

တကယ်တမ်းကျ လူတိုင်း တွေးသလိုသာ လိုက်တွေးနေမိတာပါလား

သူတို့ထက် ထူးတာဆိုလို့ ကို်ယ့်အမြင် ကိုယ့်အတွေးကို ချပြ ပြောပြ ဆွေးနွေးတာပဲရှိတာ။

တစ်ခါတစ်လေလဲ သူများထက်ထူးပြီး တွေးမိတာတွေကတော့ ချွင်းချက်ပဲထားလိုက်ပါလေ။

တွေးသမျှ ရေး၊ ရေးသမျှ တွေးနေတာ မှန်ပေမင့်

တွေးရုံနဲ့မရ ရေးဖို့အတွက် ရှာရဖွေရတာတွေကျ ရှာဖို့က ပျင်းပြန်ရော

မဂ္ဂဇင်း၊ ဂျာနယ် တစ်စောင်ကို ကောက်ဖတ်လိုက်တိုင်း သူတို့တွေဆီက တွေးစရာ၊ ရေးစရာတွေ ထွက်လာတယ်။

လူကပဲ အလိုမကျတာတွေ ဖြစ်စေချင်တာတွေ များနေလို့လားမသိ။

လက်ရှိကို ဖတ်ထား တွေးထားတာတွေ အပြည့်။

ပြောချင်တယ် ဒါပေမင့် ပြောပြန်ရင်လဲ မာဃ လွန်ဦးမယ်။

မပြောရ မနေနိုင်လို့ နည်းနည်းတော့ ပြောလိုက်ပါမလေ။

တွေးထားတဲ့ အရာလေး ပုပ်သိုး ဆွေးမြည့်မသွားခင် ချပြလိုက်တော့ တော်သေးတာပေါ့ မဟုတ်ဘူးလား

တစ်နေ့က ဖတ်မိတဲ့ ဂျာနယ်ထဲမယ် ယမကာကြော်ငြာ ပြောင်ပြောင်တင်းတင်း ပါလာတယ်။

သွေးတိုးပဲ စမ်းသလား ပြန်လည် ခွင့်ပြုချက် ချပေးလိုက်သလားတော့မသိ။

တစ်ခုတစ်လေတောင်မဟုတ် နှစ်ခုတောင် ပါလာတာ။

သူတို့များကျတော့လဲ ကြော်ငြာအား အတော်သုံးသား။

စာမျက်နှာကို အပြည့်တောင်ထည့်ထားတာ။

တစ်မျိုးသားလုံး ကျန်းမာကြံ့ခိုင်ရေးအတွက်ထင်ပါ့။

သေသေချာချာ လေ့လာပြင်ဆင်ပြီးမှပဲ ဒီအကြောင်းတွေ ထပ်ပြောပါတော့မယ်လေ။

ဒါ အမြည်းလို့သာ မှတ်လိုက်ကြပါတော့။

ဟိုအကြောင်း ဒီအကြောင်းပဲ ထပ် ဆက်ကြတာပေါ့။

လူကလဲ ရေးရင်းရေးရင်း ရေးထားတာတွေ ပြန်ကြည့်တော့ ပြုပြင်ရေးတွေ အများစု ဖြစ်နေပါလား

ဆရာလုပ်ချင်တဲ့စိတ် မကုန်သေးဘူးလို့ပဲ ပြောရမလား

အမြင်မတော်တာတွေပဲ အတွေ့များလာလို့လားတော့မသိ။

ရေးချင်တဲ့ ရသစာပေအစား ဒါတွေပဲ ရေးဖြစ်နေတယ်။

ခံစားရတဲ့အတိုင်း ထွက်လာတာတွေ ရေးတာဆိုတော့ သူ့ဟာနဲ့သူသာ ရှိပါစေတော့။

တစ်ခါတစ်ခါ ကျပြန်တော့ ပြောင်းသင့် ပြင်သင့်တာတွေ ရေးရင်း ကိုယ့်ကိုယ်ကို ပြန်ဆန်းစစ်မိပြန်ပါရော

ကိုယ်တိုင်ကရော ဘယ်လောက် ပြောင်းပြီး ပြင်ပြီးပလဲဆိုတာ။

အဖြေကတော့ ကျေနပ်အားရစရာမရှိ။

တကယ့်တကယ် ပြောကြကြေးဆို ကိုယ်က စ ပြောင်းရ ပြင်ရမှာပါလား။

အို…. ဘာပဲဖြစ်ဖြစ်လေ

ပြောင်းချင်တဲ့စိတ် ရှိနေတာဆိုတော့ အကောင်အထည်ဖော်ဖို့က မခက်ပါဘူးနော့

စိတ်သာရှင်စော ဘုရားဟောလို့ ဆိုထားတယ်မလား။

ဒီညတော့ ဘယ်တစ်ပုဒ်မှ ဖြစ်ဖြစ်ဖြစ်မြောက်မြောက် မရေးဖြစ်ဘဲ အိပ်ယာဝင်ရတော့မယ်။

စောစောအိပ်ထ ပြုကျင့်ကြ တာ ကျန်းမာရေးအတွက် အကျိုးရှိပါတယ်လေ။

ညကတော့ သူ့တာဝန်ကို ဆက်လက်ထမ်းဆောင်နေဆဲ။

သူ့ သဘာဝ သူ့အလှကို ပြသနေဆဲပါလား…….

ဒီညတော့ ဒီလောက်ပဲ ညကလေးရေ။

တစ်ရက်တာအတွက် စတင် အနားယူလိုက်တော့မယ်။

ည ကတော့ တိတ်ဆိတ်နေဆဲပါလား……………………………………..

လေးစားစွာဖြင့်

ဦးမာဃ (ခေတ္တ လူ့ပြည်)

4/6/2013 (Sat)